Saturday, 18 July 2015

కాళీదేవి - కోల్‌కతా





భవతారిణి.. మోక్షప్రదాయిని

బెంగాల్‌ ప్రాంతంలో కాళీదేవిని పూజించడం, ఆరాధించడం అధికంగా కనిపిస్తుంటుంది. ఎంతో మంది ప్రజలు ఆరాధ్య దైవంగా, ఇంటి ఇలవేల్పుగా ఆ తల్లిని కొలుస్తుంటారు. రామప్రసాద్‌ సేన్‌, రామకృష్ణ పరమహంస వంటి ఎందరో కాళీ సిద్ధులు ఆ ప్రాంతంలో కాళీ భక్తి సంప్రదాయాన్ని వ్యాపింపజేశారు. ముఖ్యంగా కోల్‌కతాలో ప్రపంచ ప్రసిద్ధ కాళీ మందిరాలున్నాయి. వాటిలో విశేషమేంటంటే.. అక్కడ కాళీఘాట్‌లో అత్యంత తీవ్ర స్వరూపిణిగా, ఉగ్రదేవతగా కనిపించే కాళీదేవి, దక్షిణేశ్వర్‌ దేవాలయంలో ప్రేమస్వరూపిణిగా, ఆహ్లాదమూర్తిగా అనుగ్రహిస్తుంది.

రెండు ఆలయాల్లోనూ భక్తజనసందోహం ఉంటుంది. దక్షయజ్ఞంలో ప్రాణాలు విడిచిన సతీదేవి ఖండితాంగాల్లో కుడిపాదం వేళ్లు పడినచోటున క్షేత్రమే కాళీఘాట్‌. అందుకే అమ్మవారు అక్కడ శక్తిస్వరూపిణిగా పొడవాటి నాలుక చాచి దర్శనమిస్తుంది. స్థానికులు ఆ తల్లిని గ్రామదేవతగా భావించి పూజిస్తారు. భూతప్రేత ప్రయోగ బాధలను, కష్టాలను తొలగించే దేవతగా, నరదిష్టిని పోగొట్టే దేవతగా కొలుస్తారు. దక్షిణేశ్వర్‌లో కొలువైన కాళిని ‘భవతారిణి’గా.. అంటే భవబంధాల నుంచి జనులను తరింపజేసి మోక్షాన్ని అనుగ్రహించే దేవతగా పూజిస్తారు. కాళికాదేవిని ప్రేమస్వరూపిణిగా భావించి ఉపాసించిన రామకృష్ణ పరమహంసకు అమ్మ అనుగ్రహం చాలా త్వరగా లభించింది. అమ్మకరుణవల్లనే ఆయన అద్వైత స్థితిని పొంది మూడురోజులపాటు నిర్వికల్ప సమాధిస్థితిలో ఉండగలిగారు. రామకృష్ణులవారికే కాదు.. ఆ తల్లిని భవతారిణీదేవిగా భక్తిగా ఉపాసిస్తే ఎవరికైనా మోక్షాన్ని అనుగ్రహిస్తుంది.

మాతా రమ్యానంద భారతి



No comments:

Post a Comment