Saturday, 5 September 2015

ఒంటిమిట్ట కోదండరామస్వామి దేవాలయం






ఒంటిమిట్ట కోదండరామస్వామి దేవాలయం

బంది పోటు దొంగల పేరుతో వెలసిన ఒంటిమిట్ట కోదండరామస్వామి దేవాలయం

కడపజిల్లాలో ఒంటిమిట్ట గ్రామ ఉంది. దీనినే ఏకశిలా నగరం అంటారు. ఇది మహర్షులకు తపోధనులకు యజ్న, యాగాలకు త్రేతా యుగంలో ప్రసిద్ధి చెందింది. ఋషుల తపస్సుకు తరచుగా రాక్షసులు భంగం కలిగించి, విఘ్నం చేసే వారు. శ్రీ రాముడు సీతా దేవి, లక్ష్మణ సమేతుడై ఒంటి మిట్టకు వచ్చాడు. ఆయన కోదండం ధరించి, పిడి బాకుతో రాక్షస వధ చేసి ఋషుల తపస్సును నిరాటంకంగా జరగటానికి దోహదం చేశాడు. సీత కోరిక మేరకు రాముడు ఒక బాణంతో భూమిని చీల్చి భూగర్భ జలాన్ని పైకి తెప్పించాడు. అది ఒక కొలనుగా మారింది. దీనిని "రామ తీర్ధం" అని పిలుస్తారు. లక్ష్మణస్వామి కూడా తానేమీ తీసి పోనని బాణంతో భూమిని చీల్చి జలధారను తెప్పించాడు. అదీ సరస్సుగా మారింది. దానికి "లక్ష్మణ తీర్ధం" అని పేరొచ్చింది. ఈ రెండు తీర్ధాలు ఇప్పటికీ అక్కడ కనిపిస్తాయి. ఋషులు యాగ సమాప్తి అయిన తర్వాత సీతారామలక్ష్మణులను అర్చించారు. వారి మూర్తులను ఏకశీల పై మలిచి అప్పటి నుండి పూజాదికాలు నిర్వహించారు. అందుకే "ఏక శిలా నగరం" అయింది. అప్పటికి అంజనేయస్వామితో రాముడికి పరిచయం కలగలేదు. అందువల్ల హనుమ మూర్తి లేదు. ద్వాపర యుగంలో జాంబవంతుడు ఈ ఏకశిలా మూర్తులను ఆగమ విధానంలో ప్రతిష్టించాడు. అందుకని దీన్ని జాంబవంత ప్రతిష్ట లేక కపిలవానర ప్రతిష్ట అంటారు.

స్థల పురాణం
కలియుగంలో వస్తు వినిమయం జరిగేది. దీనినే "బార్టర్ పద్ధతి" అంటారు. ఆ కాలంలో విలువైన వస్తువులు బంగారు ఆభరణాలను ఇంటి గోడల్లో దాచుకొనే వారు. ఆ నాడు బాగా పేరు పొందిన ఒంటడు, మిట్టడు అనే ఇద్దరు బందిపోటు దొంగలు ప్రయాణీకులను దోచుకొని బంగారం మొదలైన వాటిని దగ్గరలో ఉన్న కొండ గుహలో దాచుకొనే వారు. ఆ గుహలో ఉన్న సీతా రాములు వారికి దర్శన మిచ్చి దొంగతనం మానేసి గౌరవ ప్రదమైన జీవితం గడప మని ఆదేశించారు. అంతే, వారిలో మార్పు వచ్చి దొంగతనాలు మానేసి దివ్య జీవనం సాగించారు. శ్రీ రామునికి అత్యంత భక్తులై, ఆ మూర్తులకు గర్భాలయాన్ని నిర్మించారు. అప్పటి నుండి ఈ బంది పోటు దొంగల పేరు మీద ఈ గ్రామానికి "ఒంటి మిట్ట" అనే పేరు వచ్చింది.

చారిత్రిక గాధ
ఆలయ శిలా శాసనాలను పరిశీలిస్తే ఎన్నో విషయాలు తెలుస్తాయి ఈ దేవాలయాన్ని మూడు దశలలో నిర్మించారని తెలుస్తోంది. మొదట గర్భాలయ నిర్మాణం జరిగింది. తర్వాత ముఖ మండప నిర్మాణం జరిగింది. మూడవ దశలో గాలి గోపుర నిర్మాణం పూర్తి అయింది గుడికి ఉత్తరాన రెండు శాసనాలున్నాయి. అందులో మొదటిది 1555 నాటిది. దీన్ని గ్రామాదికారి కల్లూరి లింగయ్య రాయించారు. ఆ ప్రాంత సైనికాధికారి, విజయ నగర పాలకుడు వీర సదా శివ రాయల వద్ద పని చేసే "యతి తిరుమలయ్య దేవ మహా రాజు " పూల పుత్తూరు గ్రామాన్ని స్వామికి దానం చేశాడు. అలాగే కంచ రాజు మత్రాజయ్య భోగే పల్లి గ్రామాన్ని, మరి కొంత భూమిని రాసిచ్చాడు. రెండవ శిలా శాసనం ప్రకారం 1558లో ఒంటిమిట్ట తదితర గ్రామాలను ఆలయానికి దానం చేశాడు. రధం నిర్మించటానికి, బ్రహ్మోత్సవ నిర్వహణకు, ప్రహరీ గోడల నిర్మాణానికి దానిని వినియోగించాలని తెలిపాడు. విజయ నగర చక్రవర్తి అయిన సదా శివ రాయల ముఖ్య మంత్రి గుత్తి యేరా తిరుమల రాజు కుమారుడు నాగ రాజదేవ నాగ రాజు భూరి విరాళం అంద జేశాడు.

శిల్ప కళా వైభవం
ముఖ మండపం అనబడే కళ్యాణ మండపం 32 స్తంభాలతో నిర్మించారు. దాని పై కళా వైభవం కనువిందు చేస్తుంది. వాటి పై రామాయణ, మహాభారత, దశావతార, కాళింగ మర్దనం, గోవర్ధన గిరి ధారణా, పూతన సంహారం, నాట్య కారిణుల శిల్పాలు అత్యద్భుతంగా మలచబడినాయి. వాటిపై శిల్పించిన ఏనుగు, ఆవు చూడ తగినవి. నర్తకి శిల్పం మనల్ని విపరీతంగా ఆకర్షిస్తుంది. ఆమె ముఖంలో అనేక భావ సంపద విలువైనది. ప్రేమ, మొదలైన భావ గరిమ కొనియాడ దగింది. ఇదంతా ఏకశిలపై చెక్కి సంభ్ర మాశ్చర్యాలతో ముంచెత్తుతుంది. 165 అడుగుల ఎత్తైన గాలి గోపురం ఈ ఆలయానికి ఒక ఒక ప్రత్యేకతను చేకూర్చింది. 1652లో ఫ్రెంచ్ యాత్రికుడు తవార్నియార్ ఆలయాన్ని సందర్శించి ఈ తనివి తీరని కళా సంపదను మహా మెచ్చుకొన్నాడు. ఇంతటి మహాద్భుత ఆలయం తాను  ఎక్కడా  చూడలేదని, గొప్ప చారిత్రాత్మక కట్టడం అని కీర్తించాడు. ఇక్కడ మతంతో బాటు ప్రశాంతత, శాంతి లభిస్తాయి అనంత యాత్రికులను ఇప్పటికీ అందుకే ఆకర్షిస్తోంది. ఇప్పుడు ఈ ఆలయాన్ని దేవాదాయశాఖ నిర్వహిస్తోంది. భారతీయ పురావస్తుశాఖ ఆధ్వర్యంలో పరిరక్షింపబడుతోంది.

కొదండ రాముని దర్శించిన కొందరు ప్రముఖులు

పోతన
భాగవతాన్ని మందార మకరంద మాదుర్యాలోలికేటట్లు తెలుగులోకి అనువ దించిన బమ్మెర పోతనా మాత్యుడు ఇక్కడి వాడే. ఆయన "అల వైకుంథ పురంములో" పద్యానికి ఇదే నేపధ్యం. పద్యం మధ్యలో ఆగిపోతే, శ్రీ రాముడే స్వయంగా వచ్చి దాన్ని పూర్తి చేసింది ఇక్కడే. ఆయన ఇల్లు, పొలాలు అక్కడి చెరువు దగ్గరే ఉన్నాయి కాలగర్భంలో అవి కలిసిపోయి, కనీపించటం లేదు. ఆ ప్రదేశాన్ని దేవాదాయ శాఖ యాత్రికుల సౌకర్యార్ధం సత్రాలకు ఉపయోగిస్తోంది. ప్రతి ఏడాది "పోతన సాహిత్య పీఠం"  పోతన జయంతిని "శ్రీ రామ నవమి నాడు" ఘనంగా జరిపి  ఆయన్ను స్మరిస్తుంది.

అన్నమయ్య
వెంకటేశ్వర స్వామికి అనన్య భక్తుడు, పద కవితా పితా మహుడు తాళ్ళపాక అన్నమా చార్యులు కడప జిల్లాలో తాళ్ళపాకకు చెందిన వాడు. అది దీనికి ముప్ఫై కిలో మీటర్ల దూరంలోనే ఉంది. అన్నమయ్య ఒంటి మిట్టకు వచ్చి కోదండ రాముడిని దర్శించి కీర్తనలతో కీర్తించాడు.

వావికొలను సుబ్బా రావు
ఆంద్ర వాల్మీకి అని పిలువబడే వావి కొలను సుబ్బారావు గారు వాల్మీకి రామాయణాన్ని తెలుగులోకి అనువాదించారు. రామాయణానికి "మంధరం" అనే వ్యాఖ్యానం రాసిన మహానుభావుడాయన. ఆలయాన్ని అభివృద్ధి చేయటానికి ఇంటింటికీ తిరిగి ధనం సేకరించిన పుణ్యాత్ముడు, మూల విరాట్ కు బంగారు కవచం చేయించారు సేకరించిన ధనంతో. "భక్త సంజీవని" అనే ఆధ్యాత్మిక మాస పత్రికను దేవాలయం తరఫున నిర్వ హించారు. వీరినే "వాసు దాసు" గారు గా గౌరవంగా పిల్చుకొంటారు.

సద్గురు సమర్ధ నారాయణ మహా రాజ్
సద్గురు సమర్ధ రామ దాస స్వామి పద కొండవ పీథాది పతి అయిన శ్రీ శ్రీ సద్గురు సమర్ధ నారాయణ మహా రాజ్ ఇక్కడే లక్షలాది మందిక "రామ తారక మంత్రం "ను ఉపదేశించి అన్నదానాలను నిర్వ హించారు. ఆయన్ను అందరు ఆంజనేయ స్వామి అవతారం గా భావిస్తారు. 1961 లో సద్గురువులు, పద కొండు రోజులు లక్షలాది జనానికి అన్నదానం నిర్వ హించిన మహా భక్తుడు. అఖండ రామ నామాన్ని అందరి చేత జపింప జేస్తూ, ఆ కార్యక్రమాన్ని నిర్విఘ్నం గా కొన సాగించారు. గాలి గోపురాన్ని పునరుద్ద రించారు. స్పటిక లింగాన్ని వేద మంత్రాలతో భూమి నుండి బయటికి తీసి దాన్ని ప్రతిష్టించారు. ఇవాల్టికీ ఈ లింగాన్ని మనం దర్శించుకొవచ్చు. కోదండరామస్వామి సేవలో జీవితాన్ని పండించు కొని ముక్తి పొందారు స్వామి.

నంద గురు విజయ రాఘవా చార్యులు
నంద గురు వీర వెంకట రాఘవా చార్యులు గారిని వాసు దాసు గారు ఆలయ ప్రధాన అర్చకులు గా నియ మించారు. యోగి పుంగవులు, రామ నామ భక్తీ ప్రచారకులు, కవి, రచయిత, ఆధ్యాత్మిక శేఖరులు అయిన ఆచార్యుల వారు మహు ముఖ ప్రజ్ఞా శీలి. ఆయుర్వేద, జ్యోతిష, పంచ రాత్ర, అగమాలలో నిష్ణాతులు. వీరి కుమారులు విజయ రాఘవా చార్యులు కూడా అంతటి ప్రజ్ఞా దురంధరులే. వీరు "శ్రీ రాఘ వెంద్రసుప్రభాతం "రచించారు. దీన్ని ఒంటి మిట్ట కోదండ రామ స్వామికి అంకిత మిచ్చారు.

సాయైన్ వరద దార్న్
వీరు కొండ మాచు పల్లి గ్రామస్తులు. ఇది సిద్ధ వటం తాలూకాలో ఉంది. సత్యాగ్రహ ఉద్యమంలో పాల్గొన్న రాజకీయ నాయకులు. "కోదండ రామామ్రుతం ".రాసి ఆ కోదండ రామునికి అంకితమిచ్చిన కృతి కర్త సన్యాసం స్వీకరించి మోక్షాన్ని పొందారు.

బహవన సాయి మాల ఓబన్న
శ్రీ రాముని మీద నిత్యం పాటలు రాసి ఆలయం బయటి నుంచే స్వామికి విని పించే వాడు ఓబన్న. ఆయన అంట రాని వాడు అన్న నెపంతో అర్చకులు ఆలయ ప్రవేశానికి అంగీక రించ లేదు. కోదండ రామ స్వామి తూర్పు ముఖం గా ప్రతిష్టించి ఉన్నాడు. కాని ఈ భక్తు నికి నిరాదరణ చూసి స్వామి తన భక్తుడు ఓబన్న నిలిచి ఉన్న పశ్చిమ దిశకు తిరిగి దర్శన మిచ్చి అందర్ని సంభ్ర మాశ్చర్యాలలో ముంచెత్తాడు. దీన్ని గమనించిన అర్చకులు తమ తప్పుకు చెంప లేసుకొని ఓబన్న భక్తిని మెచ్చి ఆలయ ప్రవేశం చేయించి తప్పు దిద్దు కొన్నారు అప్పటి నుండి నిత్యం ఆలయంలో కి వచ్చి స్వామి పై కేర్తనలు పాడి విని పించే వాడు ఆ తర్వాతస్వామి మళ్ళీ తూర్పు ముఖమై కొలువున్నాడు. అదీ భక్తుని గొప్ప దనం. అనన్య భక్తీ కి కులం, మతం అడ్డంకి కావు అని భక్త ఓబయ్య నిరూపించాడు. 2001లో ముఖ్య మంత్రి చంద్ర బాబు ఒంటి మిట్ట ను దర్శించి అక్కడి అస్ప్రుస్యత ను రూపు మాపే కార్య క్రమంలో పాల్గొన్నారు. ఓబయ్య కధను పూజారి గారి ద్వారా తెలుసుకొని విభ్రాంతికి లోనైనారు.

ఇమాం బేగ్ నవాబు.
కోదండరాముని అభిషేకానికి ఇక్కడ బావి తవ్వించిన ముస్లిం భక్తుడు ఇమాం బేగ్.న వాబు గారు సిద్ధ వటం కోటకు వెళ్తూ ఇక్కడ విశ్రమించారు అక్కడి కోనేటి నీటిని త్రాగి తన గుర్రానికి కూడా తాగించారు అప్పుడు అనుకో కుండా కోదండ రాముడు ఆయన్ను పేరు పెట్టి పిలవటం విని నిర్ఘాంత పోయారు. స్వామి మహాత్మ్యాన్ని అర్ధం చేసుకొన్నారు. అప్పుడే వెంటనే బావి త్రవ్వించి అభిషేకానికి విని యోగించే ఏర్పాటు చేశారు.

వర కవాల్ అనే ఆయన కోదండరామ శతకాన్ని రాశాడు. అందులో ఆనాటి రాజకీయ సంక్షోభాన్ని వివరించాడు. దీన్ని వెంకటేశ్వర విశ్వ విద్యాలయం వారు భద్రపరిచారు. నెల్లూరు జిల్లాలో వరకావైపూడి అనే గ్రామం ఉంది.
మత్తిరాజులు ఆలయ నిర్మాణంలో పాలుపంచు కొన్నారు. దశరధ రామ శతకాన్ని ఉప్పు గుండూరు వెంకటకవి రాసి స్వామికి అంకిత మిచ్చాడు.
అయ్యలరాజు రామభద్ర కవి "రామాభ్యుదయం "కావ్యం రాశాడు. చిన్నతనంలో ఆయన్ను ఆలయంలో వదిలేసి తలుపులు వేసి వెళ్లి పోతే, గుక్క పట్టి ఏడుస్తుంటే సీతా దేవి ఆయనకు స్తన్యం ఇచ్చి ఆకలి తీర్చింది.
అయ్యలరాజు తిప్పరాజు అనే కవి శ్రేష్టుడు "రఘు వీర శతకం" రాసిన ఒంటి మిట్ట నివాసి. ఆయనే శ్రీ నాదుడికి కనకాభి షేకం చేశాడు. ఈయన్నే త్రిపురాంతకుడు అంటారు.

ఇంత మంది కవులు, పండితులు, రాజులు నవాబులు ఒంటి మిట్ట కోదండ రామ స్వామిని దర్శించి ఆయన పై శతకాలు, కావ్యాలు రాసి, అంకిత మిచ్చి జీవితాన్ని ధన్యం చేసుకొన్నారు. స్వామికి ఇంత వైభవం రావటానికిమూల కారణం అయిన బందిపోటుదొంగలు ఒంటడు మిట్టడు. అందుకే చిరకాలంగా మనకు స్మరణలో ఉండిపోయారు. జీవితాలను ధన్యం చేసుకొన్నారు.




No comments:

Post a Comment